I januar kom den gledelege meldinga. Kviteseid næringshage var tatt opp i SIVA-laget. Det tyder i alt ni millionar kroner i støtte, fordelt på dei 10 neste åra. Det tyder også at næringshagen i Kviteseid er i ferd med å bli ein sentral for gründarar og bedrifter i andre distriktskommunar i Telemark.
Under ein pressekonferanse på kommunehuset i Kviteseid i går fortalde styreleiar for den nye næringshagen, Gunnar Ruud, at SIVA i tillegg vil gå inn som aksjeeigar og ha ein representant i styret for næringshagen. Det blir aksjeutviding og i løpet av våren vil SIVA spytte inn 100.000 kroner i selskapet.
– Det var uventa for oss. Men dei grunngjev det med at dette er den einaste næringshagen i Telemark og SIVA ser dette som si satsing i Telemark, saman med fylkeskommunen. Me føler me har fått ein flying start, sa ein svært nøgd Gunnar Ruud.
Kommunal støtte
Kviteseid kommune har også gått inn som aksjeeigar, med 145.000 kroner. Kviteseid næringslag og seks andre bedrifter har også kjøpt aksjar, og tilsaman har desse aksjemajoriteten i næringshagen.
– Kommunen er stolt av å ha fått lov til og vere katalysator for dette prosjektet. Det er moro og vere med, og me håpar me får vere med lenge, sa ordførar Torstein Tveito på pressekonferansen.
Neste steg er å få på plass ein dyktig dagleg leiar til næringshagen, som er lokalisert til det gamle Findalenbygget i Kviteseidbyen. I utlysningsteksten står det at styret ønskjer ein eller ei som kan arbeide målretta, er resultatorientert, handlekraftig og løysingsorientert, og har kunnskap om og teft for forretningsutvikling og nettverksbygging, for å nemne noko.
– Me trur dette er ei attraktiv stilling, som mange vil søkje på, sa Gunnar Ruud.
Selskapet for industrivekst SF, SIVA, støttar i alt 42 næringshagar som ligg i utkantstrok i Noreg. Selskapet skal bidra til vekst og utvikling, og har nært samarbeid Norges forskningsråd, Innovasjon Norge og fylkeskommunane. Eigarskapet blir forvalta av Nærings- og handelsdepartementet.
Lovar bedriftsauke
Difor er dette verdifullt, ikkje bare for bedrifter i Kviteseid, men i heile Telemark. Fyresdal næringshage var også ein av søkjarane denne gongen. Dei fekk ikkje støtte denne gongen, men kan velje og søkje på nytt. Enn så lenge er kviteseidingane einaste og ikkje minst, dei fyrste.
I løpet av tre år skal Kviteseid næringshage tilføre seg sjølv fem nye bedrifter, som skal ha tilsaman 10 tilsette. I dag startar næringshagen med i alt 25 tilsette fordelt på seks bedrifter, så talet på tilsette skal altså auke til 35.
– Tenk kva det kan bli i løpet av 10 år, sa ordførar Tveito, med eit stort smil.
– Me skal få inn ein god dagleg leiar, som kan sjå heile regionen under eitt. Etterkvart ser eg for meg at det kan bli fleire stillingar i næringshagen, som skal arbeide for å knyte nettverk i Telemark, sa Arnt Helge Hauglid, som driv Hauglid Eiendom. Litt utanfor Kviteseid sentrum og Findalenbygget ligg Veksthuset, der mellom andre Vest-Telemark Næringsutvikling, VTNU, held hus. Gunnar Ruud meinte VTNU og næringshagen vil gje gode synergiar begge vegar.
– Me vil nytte oss av all den gode kompetansen VTNU har. Desse vil ikkje stå i konflikt med kvarandre, sa Gunnar Ruud.
