God Manheim-cd

Når det unge og lovande plateselskapet Ta: lik i haust kom med cd-en Manheimspel så var det nok ei interessant utgjeving fra selskapet.
Gudmund og Magne Manheim var fødd inn i ein stor søskenflokk med sterke røter til folkemusikken i Vest-Telemark. Både faren Harald og bestefar Egil hadde slåttar i arv etter Langedragen og Leiv Sandsdalen, og hadde også besøk av Lars Fykerud som budde åtte dagar på Manhem ein gong.
Slåttane er både fra NRK og private opptak. Best lydkvalitet har naturleg nok NRK-opptaka. Og særleg er det moro å høyre Gudmund frå det året han var i storslag – 1979. Han vann si klasse på landskappleiken i Førde og spelte også svært godt i Porsgrunn.
Slåttane "Guro Heddelid" og "Rjukanfossen" flyt avgarde med intenst driv og dåm av toppklasse. Også ei svært god form av "Vårlengt" spelar Gudmund på plata. Magne har ein litt annan og meir forsiktig spelestil, men også han spelar nøyaktig, reint og formfast.
Denne anmeldaren synest svært godt om Magnes versjon av "Normannsklubben" på omstilt fele – ein vakker melankolsk stemning. Også storslåtten "Sandalsvrita" får han godt fram. Alt i alt ein fin dokumentasjon av ein viktig folkemusikkfamilie i Telemark.

Publisert fredag 11. desember 2009 kl. 22:59.