Lyrisk slåttespel

Når det unge plateselskapet Ta:lik - her i samarbeid med NRK gjev ut opptak av dei gamle lyriske meistrane Lars Skjervheim frå Myrkdalen ved Voss og Torleiv Bolstad frå Øystre Slidre i Valdres – er det ei fin gjenoppleving av slåttespel frå dei gode, gamle dagar. Det vil seie rundt 1970. Skjervheim spelar stoff etter Sjur Helgeland og Ola Mosafinn. Særleg likar denne anmeldaren rull etter Mosafinn, lyarslåtten Nøringen og rullen Rekveen etter Nils Rekve. Men også den trollstilte Bjølleslåtten etter Mosafinn er fyldig, lyrisk og reint framført.
Torleiv Bolstad var ekspert på godt foredrag med eit sugande strøk som gjer seg ekstra godt på dei fine lyarslåttane i Valdres – som idag er altfor lite bruka. Både "Ho Guro" etter Beitohaugen og ein etter den lyriske meisteren Ola Okshovd gjev denne CD-en eit løft godt over gjennomsnittet.
Også den nedstilte Sylkjegulen er eit eksempel på Bolstad si evne til å tøye ut musikken nesten som gummistrikk. Dette viser kva Bolstad meinte når han krevde "lengre strøk" av spelemenn han høyrde på og rettleidde.
Dette er ei plate for dei som likar slåttar med store lyriske og melodiske kvalitetar.

Publisert fredag 11. desember 2009 kl. 22:27.