Heimesiger for ny vin

SELJORD Seljordvin, produsert i nabobygget på Vekan, har vore i nokre utsals hyller nokre dagar. Til Seljord kom den i går. Og då Knut Lundeberg tok mot pallen med den djup raude skogsbærvinen i går så visste han at den kom til å slå foredla franske druer ned i støvlane.

Godt sal

Om det ikkje var kø då gitteret framom polvarene blei rulla opp, var trafikken ganske god, fortel Lundeberg. Med god bransjekunnskap og service viste han vegen til hylleplassen der vinen med sjøormetikett hadde fått sin plass. Ikkje så langt frå kassa og på lagleg hyllehøgde sto flaskene folk ville ha denne dagen.

Moro med lokal vin

- Det er klart eg må kjøpe ei flaske av vinen frå Seljord. Det er godt med ei flaske vin av og til. Og det er artig med denne som er laga i Seljord og på skogsbær. Ragna Kloster var ikkje i tvil om at det var denne ho skulle handle denne dagen.

Under juletreet

Anne Brit P. Lie sikra seg ei flaske på første dagen. Det skal bli julegåve, røpar ho – utan å røpe kven som skal få "fyrstedagsflaska". Folk har jo så mykje av mykje så ei flaske vin tenker eg kan vera ei betre løysing enn noko som bare blir sett i ei hylle, meiner Anne Brit. Sjølvsagt kjem ho og til å prøve om vinen fell i smak.

Grannepola

Frå utsala i Åmot i Vinje og i Bø blir det meldt om eit godt sal på vinen med sjøormetikett. Nokre har etterlyst brunkenbergeren som blei omtalt i avisa. Men den er og blir historie. Folk er om lag 50 år for seint ute for å kjøpe den. Nå er det flytande antioksydantar frå blåbær og tyttebær som er Seljords og Telemarks merkevare på Vinmonopolet.