Me er to jenter på 18 og 19 år, som kanskje er litt i overkant opptekne av politikk. Me får ein del spørsmål av venner som: «Kvifor gidd de, dei vaksne høyrer jo ikkje uansett», eller «herregud er det ikkje litt meiningslaust å bruke så mykje tid på noko ein ikkje får betalt for ein gong?» Då svarar me alltid: «Men viss me ikkje prøver, kven skal prøve då?».
Me reiser rundt på vidaregåande skular i heile fylket for å få fleire ungdom til å engasjere seg. Mange me møter seier at dei ikkje er opptekne av politikk. Men er eigentleg dette riktig? For med ein gong me spør dei om kva dei syns om kantinematen eller skulehelsetenesta, ja då blir dei fleste ganske så revet med og har ein rekkje ting dei irriterer seg over og som dei skulle ynskje var annleis.
Politikk er ikkje berre dei store internasjonale spørsmåla som korleis ein skal løyse klimakrisa eller krig. Kommunen bestemmer blant anna over barnehagar, legekontora og barne – og ungdomskulane. Så viss du syns at for eksempel seksualundervisninga du har på skulen er altfor dårleg, ja då er det i kommunepolitikken du kan gjere noko direkte med det.
Me har vore med i politikken i 2-3 år. På den tida har me fått gjennomslag for ting me syns er viktig at lokalsamfunnet vårt kjempar for, som gratis skulemat for grunnskulen, gratis SFO for første og andre klasse og at unge i distriktet skal få like god psykisk helsehjelp som unge i byen.
Me gidd å engasjere oss fordi me har erfart at det nyttar. Sjølv om endringane ikkje kjem over natta, så skjer dei i alle fall ikkje viss ein ikkje forsøker. Ved å seie si meining i staden for å seie at «Politikarar gjer ikkje ein dritt!», blir sakar også endra. Så neste gong du tenkjer at noko burde bli endra, så engasjer deg! Stem ved valet, meld deg inn i eit parti og still til val!
SI DIN MENING! Vi i Varden vil gjerne at du skal bidra med din mening. Send ditt leserinnlegg til debatt@varden.no